試解澳門同志平權遲起步原因

本轉載評論文章僅代表本會成員之個人觀點,並不代表澳門彩虹整體之立場。

自社工局喺上年(二0一二年)十一月宣佈喺未來家暴立法刪除「同性同居」定義後,相繼有澳門同志團體正式登記成立,喺短短嘅一年間,由「幾乎零到有」舉辦咗多場面對公眾或面對同志社群嘅活動。喺立法層面上,高天賜議員更提出《同性民事結合》法案,唯可惜喺只有提案人一票贊成下被大比數否決。筆者亦有幸喺適逢立法會選舉期間,喺我主導下編寫嘅名單政綱入面,明確要求「居民不論性傾向、性別身份,皆應享有平等之結合、接受全面性教育、免受歧視等權利。公共當局有責任保障澳門成為容納多元性傾向、性別身份之社會」。

要試解釋澳門同志平權運動點解咁遲先起步,可先比較本地同鄰埠法制上差異入手。香港男男性行為係刑事罪行(曾發生有英藉警司被檢控後自殺嘅慘劇),其後喺九十年代走過「去刑事化」嘅過程。相比澳門,經筆者翻查,一九九五公佈嘅《刑法典》同埋之前正效咗百幾年嘅葡國《刑法典》都冇將男男性行為列刑事,澳門無須亦未曾走過「去刑事化」嘅過程。換句話講,至少喺法律制度上,澳門同志可謂「未曾受過壓迫」。

喺教育層面上,又要同鄰埠比較,香港有基督宗教背景嘅學校會公開指斥同性戀係聖經所指嘅罪行,並嚇啲學生同性戀者要落地獄(雖然基督新教冇「煉獄」Purgatory 概念)。睇返澳門,筆者由幼稚園至中學都喺基督宗教背景學校讀書,但未由教師或教會人員口中公開聽過任何攻擊同性戀嘅說話。喺「無表示認同」亦「無表示排斥」喺情況下,澳門嘅學校傾向將性傾向議題視為「禁忌」,最好唔好提。但當然,「唔好提」總比香港公開指罵嘅情況好。概括咁講,澳門同志學生大多未感受過來自教育機構明顯嘅「壓迫」。

當然,對澳門同志朋友嚟講,最大壓力係來自家庭(調查結果見二0一三年一月同志權益關注組發佈「澳門同志處境初步調查」結果),雖然本澳同志社群長年有私人舉辦聯誼性質嘅活動(例如唱K、食飯等),但似乎要到出現制度上嘅壓迫(社工局聯同法務局刪除家暴法案同性同居定義),先至能夠成為本澳同志平權運動嘅「起步點」。

今個星期六香港將會有一年一度同志遊行(十一月九日下晝兩點維園集合),希望到時見到更多澳門支持同志平權嘅朋友。

周庭希

原載:2013年11月08日《訊報》
註:刊登版本關於同志權益關注組發佈調查結果年份為筆誤,應為2013年。

08 November 2013 - Movement Started Late in Macau - Web

Posted in 聲明
​​澳門首個以同志(同性戀、雙性戀、跨性別)權益為宗旨的團體